2018թ. հունվարի 1-ից հանրապետությունում ներդրվել է  նոր`  "Ընթացիկ նորոգման, բարեկարգման և կոմունալ տնտեսության գծով Արցախի Հանրապետության շրջանների կարողությունների զարգացման"  ծրագիրը, որի շրջանակներում նախատեսվում է համայնքների ճանապարհների սալապատման,  շրջկենտրոնների սանմաքրման, կանաչապատման, ջրամատակարարման և բարեկարգման աշխատանքների իրականացում և այլն:

         Ծրագրի դրույթները գործնականում լիարժեք կիրառելու, նորաստեղծ փակ բաժնետիրական ընկերությունների  պատասխանատուներին տեղերում օժանդակություն ցուցաբերելու նպատակով ձևավորվել է ԱՀ ֆինանսների,  գյուղատնտեսության, քաղաքաշինության ու էկոնոմիկայի և արտադրական ենթակառուցվածքների նախարարությունների մասնագետների համատեղ աշխատանքային խումբ, որի կողմից սույն թվականի փետրվարի 28-ից մեկնարկել է հանդիպումների շարքը:

       Առաջին հանդիպումները կայացել են  Հադրութի և Ասկերանի շրջաններում, որոնց  ընթացքում ընկերությունների պատասխանատու անձանց տեղում մեթոդական աջակցություն է ցուցաբերվել, լուծումներ տրվել ծրագրի կիրառության ընթացքում առաջ եկած խնդիրներին և հարցերին:

         Հանդիպումները շարունակվում են և առաջիկայում դրանք կանցկացվեն նաև հանրապետության մյուս շրջկենտրոններում: