ԱՀ ֆինանսների նախարար Վահրամ Բաղդասարյանը օգոստոսի 11-ին ԱՀ Ազգային ժողովի արտահերթ նստաշրջանում ներկայացրեց «Արցախի Հանրապետության 2020 թվականի պետական բյուջեի մասին» օրենքում փոփոխություններ կատարելու մասին» օրենքի նախագիծը, որը բխում է Արցախի Հանրապետության Նախագահի 2020-2025 թվականների ծրագրի դրույթներից: Նախագծի համաձայն ԱՀ 2020 թվականի պետական բյուջեի եկամուտները նախատեսվում է ավելացնել 5.1 մլրդ ՀՀ դրամով` ի հաշիվ Հայաստանի Հանրապետությունից ստացվող բյուջետային վարկի գումարի չափի ավելացման, իսկ պետական բյուջեի ծախսերը` 14.8 մլրդ ՀՀ դրամով: Փոփոխությունների արդյունքով 2020 թվականի պետական բյուջեի եկամուտները կկազմեն 126.1 մլրդ դրամ, ծախսերը՝ 135.7 մլրդ դրամ, իսկ դեֆիցիտը՝ 9.6 մլրդ դրամ, որի ֆինանսավորումն կիրականացվի ստացվելիք փոխառու միջոցների հաշվին: Արցախի Հանրապետության 2020 թվականի պետական բյուջեի մի շարք ծախսային ծրագրերում առաջարկվում է կատարել ավելացումներ, որոնք կուղղվեն ոռոգման ժամանակակից համակարգերի ներդրմանը, Արցախի Հանրապետության չգազաֆիկացված համայնքներում բնակիչների կողմից սպառվող էլեկտրաէներգիայի սակագնի մասնակի սուբսիդավորմանը, COVID-19 համավարակի տարածման կանխարգելման աշխատանքներին, սեպտեմբերի 1-ից առողջապահության ոլորտի աշխատողների աշխատավարձերի բարձրացմանը, անվճար բարձրագույն և միջին մասնագիտական կրթության ներդրմանը, գյուղերի ճանապարհների սալապատման աշխատանքներին, համայնքներին և բնակիչներին շինանյութերի տրամադրմանը, Արցախի Հանրապետության կառավարության առջև դրված առաջնային և ռազմավարական նշանակություն ունեցող մի շարք օբյեկտների կառուցման և վերանորոգման ծրագրերի իրականացմանը։ «Արցախի Հանրապետության 2020 թվականի պետական բյուջեի մասին» օրենքում փոփոխություններ կատարելու մասին» օրենքի նախագիծը ձայների մեծամասնությամբ (26 կողմ, 6 դեմ) ընդունվեց երկրորդ ընթերցմամբ:
|