Համաձայն ԱՀ ֆինանսների և էկոնոմիկայի նախարար Վ.Բաղդասարյանի 2022թ. փետրվարի 14-ի թիվ 13 հրամանի` Անդրանիկ Վլադիմիրի Գասպարյանը ազատվել է "Գնումների աջակցման կենտրոն" ՊՈԱԿ-ի տնօրենի պաշտոնից` իր դիմումի համաձայն: Նախարարի մեկ այլ հրամանով  նույն պաշտոնում նշանակվել է Վլադիմիր Վահիկի Գրիգորյանը:

    Նախարարը "Գնումների աջակցման կենտրոն" ՊՈԱԿ-ի աշխատակազմին է ներկայացրել նորանշանակ տնօրենին, վերջինիս մաղթելով բեղմնավոր և արդյունավետ աշխատանք: Նախարարը ընդգծեց նույն կառույցում նրա տարիների աշխատանքային փորձը և մասնագիտական ունակությունները, որոնք կնպաստեն 2022թ. գնումների ոլորտում որդեգրված նոր քաղաքականության իրագործմանը: Միաժամանակ Վ. Բաղդասարյանը նշեց, որ Վ. Գրիգորյանի նշանակումը համապատասխանում է ԱՀ Նախագահ Ա.Հարությունյանի` տարբեր քաղաքական ուժերի հետ համագործակցության քաղաքականությանը, դրանով նաև ուժեղացնելով հանրային վերահսկողությունը պետական բյուջետային ծախսերի նկատմամբ:

    Վ. Բաղդասարյանը շնորհակալություն է հայտնել նախկին տնօրեն Ա.Գասպարյանին տարիների ներդաշնակ ու արդյունավետ աշխատանքի համար, նշելով, որ Ա.Գասպարյանը կշարունակի իր աշխատանքային գործունեությունը նախարարության կազմում` համակարգելով նաև գնումների գործընթացը: